Fran Amil (A Coruña, 1971) ten unha longa traxectoria na música galega e en galego, dende os anos 90 do século XX, sendo membro de grupos como Os Papaqueixos, Ruxe-Ruxe, Diplomáticos de Monte Alto, Ulträqäns e Tres Trebóns.

No ano 2016 liderou como cantante e compositor o álbum “A voz do vento”, adicado á figura de Manuel María coincidindo coa celebración do Día das Letras Galegas, cun disco cheo de rock, pop e fusión folk. Unha voz de sempre con aromas modernos.

No ano 2021 publica “Popsía Vol. 1”, pop refrescante que achega clásicos da lírica galega de tódolos tempos aos nosos días. O vehículo escollido para acadar este obxectivo tradúcese en interpretacións musicais que abranguen os xéneros máis actuais da escena musical.

Fran Amil practica unha música lixeira e cantareira que permanece teimuda e rítmica na memoria xa dende a primeira escoita.

Con Chuches Amil abandeira un proxecto musical para toda a familia. A discoteca ideal para atreverse cos primeiros pasos bailabeis e, ao tempo, para mergullarse na tradición musical do beat e do rock cun aceno contemporáneo. Un tesouro musical con vocación de permanencia no tempo e na memoria.

POPSÍA DE FRAN AMIL

“Popsía Vol. I” revélase unha evidencia de que a música e a poesía están intimamente vencelladas, pois ámbalas dúas artes comparten, como nexo na súa estrutura máis íntima, a semente do ritmo. O ritmo como identidade común exerce unha relación de irmandade que agroma prístina no tratamento que Fran Amil aporta a un disco que, segundo escribe Fernando Montenegro en “Sermos Galiza” do 7 de xaneiro de 2022: “…alén do repertorio, o verdadeiramente interesante é a demostración de que o poema enche de contido toda clase de música. Ou de que o pop pode seguir xogando á inxenuidade ao tempo que lanza cargas de profundidade, subliñando menos a profundidade e centrándose máis na carga… …”Popsía” ten o espírito xuvenil e unha alegría madura. Recorre ao pop para filtrar emocións líricas, ocultando tras o entusiasmo que hai outros mundos pero que están nesa música.”